Een Gânką döar 't aule Uelsen
- Kapitel 7 -
In Erinnerung brengen mugg ik noch, at to Uelsen ien
de Joâren ok 'ne Melkwage höarde. Tohoape met sien Bröar
föarde Schoulten Gerrit van 'n Stenebarg de grote witte Wage, de
van een swatt Peärd trökken wööd. Gerrit satt vöarne
up 't Sittplänken. He bedeende van hierut ok de Huusfrauen. Met
'ne Klingel künnigde he eär Kummen an. Sien Bröar lööp
meestieden 'nen Äind drachter an. Denn brachde de Melk bij de Löö
an 't Huus, want verschäidenene woll nich up de Melkwage wochen.
Se hadden dann denn Melkpott up 'n Tuunpoal sett'. Off en to mäilde
he sik ok an. Met een lânk Bloashöarn, wat 'nen heldern Klânk
had, tuude he döar de Stroaten.
Buten Schoulten-Keärls
met de Melkwage had ok August Harde siene faste Stee in 't Dorp. He
brachde de Kipsche Krânte round. Altied was he flijnk bij Hând.
Niets stottde he bij de Löö de Huusdöare löss (Breefkasten
off Klingel had hoast genene), löide »Zeitung« en smeet 't Bladd
achter de Döare langs en was ok al weär futt. At men de up
verdachte was, kunn man em offpassen, want he kwamm ait üm de sölwe
Tied. Dann kunn man van em in 'ne Kottigkäid71
heel wat wies wödden. He wüss dat Nijste a' eärder at
et de Krânte schrewen had. Besünners at de ene verludd wödden
was, kunn Harden August präzise vertellen well ut de Tied was en
wat em schaad had en wu lange he a' nich meär köint had.
